Кеңес Рақышев – соңғы жиырма жылда қаржы, спорт және технология салаларында маңызды жетістіктерге қол жеткізген Қазақстандық инвестор және кәсіпкер.

Қазіргі уақытта Рақышев Fincraft Group (NCOM.KZ) Президенті және акциялары Қазақстан қор биржасында (KASE) бағаланатын Fincraft Resources компаниясының мажоритарлық акционері болып табылады. Сонымен қатар, ол металлургия және энергетика салаларында да елеулі жетістіктерге жетіп, бірнеше ірі компаниялардың құрылымында жетекші рөл атқарды. Атап айтқанда, Sat & Company директорлар кеңесінің төрағасы, Petropavlovsk және Central Asia Metals компанияларының мажоритарлық акционері болды.

Кеңес Рақышев білімін Саид бизнес мектебінде, Оксфорд университетінде және Лондон Бизнес мектебінде кеңейтіп, халықаралық деңгейдегі іскерлік дағдыларын шыңдаған. Сонымен қатар, ол Қазақ экономика университетін «Қаржы және кредит» мамандығы бойынша, Қазақ ұлттық заң академиясын «Құқық» мамандығы бойынша тәмамдаған.

Кәсіби қызметімен қатар, Кеңес Рақышев қайырымдылық саласына да белсенді түрде атсалысып келеді. 2002 жылы жұбайы Әсел Тасмағамбетовамен бірге құрған «Сәби» қайырымдылық қоры Қазақстандағы алғашқы жеке қайырымдылық ұйымдарының бірі болып табылады. Қор әлеуметтік маңызы бар кең ауқымды медициналық, білім беру және спорт салаларында маңызды бастамаларды қолдауға бағытталған.

2012 жылдан 2016 жылға дейін Қазақстан дзюдо федерациясының, ал 2019 жылдан 2024 жылға дейін Қазақстан бокс федерациясының президенті қызметін абыроймен атқарды.

2013 жылдан бері Forbes тізіміне енген Кеңес Рақышев, Қазақстанның әлемдік экономикадағы ықпалын арттыруға бағытталған жобаларды қолдай отырып, елдің халықаралық беделін арттыруға маңызды үлес қосып келеді.